Khwabon ke Jugnu

Description

Maine apni sahityik yatra ki shuruaat varsh 2020 mein prakashit apne angrezi kavya-sangrah Poetry – A Garland of Words se ki thi. Sheeghra hi mujhe apni mitti ki bhasha, uski aatmeeyata aur uski gahraiyon ne Hindi mein likhne ke liye prerit kiya. Isi prerna ke phalswaroop meri doosri pustak Khushboo Bikherati Pagdandiyan tatha uske baad Sharabati Zindagi prakashit hui.

In teenon pustakon ko mile apaar sneh aur safalta ke pashchat ab main apna naya kavya-sangrah – Khwabon ke Jugnu aapke samaksh prastut kar raha hoon. Is sankalan mein maine shahron mein rah rahe yuvaon ki kashmakash bhari zindagi, unke rozmarra ke sangharshon aur sapnon ko shabdon mein abhivyakt kiya hai. Saath hi, gaon lautne ki unki ummeed, apnapan aur jadon se judne ki chah ko bhi samvedansheelta ke saath ukera hai.

Is kavya-sangrah mein paryavaran ke prati jagrukta, prem ki komal anubhutiyan, tatha haasya-ras se paripoorn kuch kavitaon ko bhi chutile andaaz mein prastut kiya hai. Mujhe poorn vishwas hai ki aap is kavya-sangrah ko bhi usi prakar apna sneh aur aashirvaad denge, jaisa aapne mere poorvavarti kavya-sangrahon ko diya hai.

About The Author

Margesh Rai (Margdarshan) ka janm 1 September, 1995 ko Uttar Pradesh mein sthit Mahadev ki nagri Kashi (Banaras) mein hua. Saint Johns School, Ghazipur se apni prarambhik shiksha prapt karne ke baad inhone GLA Vishwavidyalaya, Mathura se snatak ki upadhi arjit ki.

Bachpan se hi Margesh Rai (Margdarshan) apne kavyatmak andaaz aur maskhare swabhav ke kaaran apne mitron ke beech vishesh roop se lokpriya rahe hain. Sahitya se unka judaav prarambh se hi gahra aur aatmiya raha hai. Unke jeevan par pitaji ka vishesh prabhav raha hai, aur kavita likhne ki prerna bhi unhe apne pita se hi mili.

Shanti aur sukoon ki talaash mein unhone prakriti ka daaman thaama, jo aage chalkar unki kavyatmak abhivyakti ka sashakt madhyam bani. Apni kavitaon ke madhyam se ve yuvaon ka aatmavishwas badhane, unhe prerit karne aur jeevan ke prati sakaratmak drishtikon viksit karne ka prayas karte hain.

Poetry – A Garland of Words, Khushboo Bikherati Pagdandiyan aur Sharabati Zindagi jaisi pustakon ki safalta ke baad Margesh Rai (Margdarshan) apni nai peshkash, kavya-sangrah “Khwabon ke Jugnu” ke saath pathakon ke samaksh upasthit hain.

Is pustak mein unhone jeevan ke vivid rangon ko ukerne ke saath-saath samajik muddon par bhi saarthak prakash dala hai. Unki kavitaon mein prakriti aur maanviya bhavnaon ke beech sundar samanjasya dekhne ko milta hai. Saath hi, unki rachnaon mein prakriti ka maanvikaran bhi prabhavshali roop mein upasthit hai, jo yeh darshata hai ki Margesh chhayavaadi kaviyon se gahraai se prerit rahe hain.